काठमाडौँ । बडादसैँअन्तर्गत नवरात्रको पाँचौँ दिन आज बिहीबार नवदुर्गामध्येकी पाँचौँ स्वरूप स्कन्दमाताको विधिपूर्वक पूजा-आराधना गरिँदै छ। यस अवसरमा देशभरका घर, पूजा कोठा, दसैँघर तथा शक्तिपीठहरूमा बिहानैदेखि भक्तजनहरूले स्कन्दमाताको पूजा-अर्चना गरिरहेका छन्।
प्रत्येक वर्ष आश्विन शुक्ल पञ्चमीका दिन स्कन्दमाताको विशेष पूजा गर्ने धार्मिक तथा पौराणिक परम्परा छ। भगवान् स्कन्द अर्थात् कार्तिकेयकी माता भएकाले उनलाई स्कन्दमाता भनिएको हो। कमलको फूलमाथि विराजमान हुने भएकाले उनलाई पद्मासना देवीका रूपमा पनि पूजा गरिन्छ। चार हात भएकी स्कन्दमाताको काखमा भगवान् कार्तिकेय विराजमान रहेको धार्मिक मान्यता छ।
स्कन्दमाताको भक्तिपूर्वक पूजा-आराधना गर्नाले ऐश्वर्य, विद्या, शक्ति तथा मोक्ष प्राप्त हुनुका साथै जीवनमा सुख, शान्ति र समृद्धि छाउने धार्मिक विश्वास रहेको छ।
गत असोज २५ गते वैदिक विधिअनुसार घटस्थापना गरी जमरा राखेसँगै सुरु भएको नवरात्रमा पहिलो दिन शैलपुत्री, दोस्रो दिन ब्रह्मचारिणी, तेस्रो दिन चन्द्रघण्टा र चौथो दिन कुष्माण्डा देवीको पूजा गरिएको थियो। आज पाँचौँ दिन स्कन्दमाताको पूजा गरिँदै छ भने आगामी दिनमा क्रमशः कात्यायनी, कालरात्रि, महागौरी र सिद्धिदात्री देवीको पूजा-अर्चना गरिनेछ।
नवरात्रका नौ दिनसम्म घटस्थापना गरिएको स्थानमा दुर्गा सप्तशती (चण्डी), श्रीमद्देवीभागवत तथा विभिन्न देवी स्तोत्रहरूको नियमित पाठ-पारायण गर्ने परम्परा छ। आश्विन शुक्ल प्रतिपदादेखि नवमीसम्म देवीको विशेष उपासना गरेपछि विजयादशमीका दिन मान्यजनबाट टीका र जमरा ग्रहण गरिन्छ। यसरी सुरु हुने दसैँ पर्व कोजाग्रत पूर्णिमासम्म १५ दिन हर्षोल्लासका साथ मनाइन्छ।
दसैँको पाँचौँ दिन आज काठमाडौँ उपत्यकाका प्रमुख शक्तिपीठहरू गुह्येश्वरी, मैतीदेवी, नक्साल भगवती, भद्रकाली, शोभा भगवती, कलङ्कीमाई र सङ्कटालगायतका मन्दिरमा दर्शन तथा पूजाआराधना गर्ने भक्तजनको ठूलो भीड लागेको छ।
त्यस्तै, उपत्यकाबाहिरका प्रसिद्ध देवी मन्दिरहरूमा पनि बिहानैदेखि श्रद्धालुको घुइँचो लागेको छ। काभ्रेको पलाञ्चोक भगवती, गोरखाको मनकामना, पोखराको विन्ध्यवासिनी र तालबाराही, पर्साको गहवामाई, धनुषाको छिन्नमस्ता, बागलुङ कालिका तथा सुदूरपश्चिमको उग्रतारालगायतका शक्तिपीठहरूमा भक्तजनहरू पूजा-अर्चना र दर्शनका लागि पुगेका छन्।
नवरात्रको अवधिमा शक्तिस्वरूपा नवदुर्गाको पूजा गर्नाले मनोकामना पूरा हुने, दुःख-कष्ट हट्ने र परिवारमा सुख-समृद्धि कायम हुने धार्मिक विश्वास रहिआएको छ।