सर्लाही, — बलरा नगरपालिकाको वार्ड नम्बर १० सुदामामा आज एतिहासिक महाबिरी झण्डा मेला भव्य रूपमा सम्पन्न भएको छ। जनमत पार्टीका सर्लाही जिल्ला इन्चार्ज श्री चन यादव (सुजन)ले रिबन काटी मेलाको औपचारिक उद्घाटन गर्नुभयो। स्थानीय समुदायको सक्रिय सहभागिता र उत्साहका बीच सम्पन्न यो मेला सांस्कृतिक, धार्मिक र खेलकुदको अद्वितीय संगमका रूपमा देखिएको छ।
उद्घाटन समारोहमा जनमत पार्टीका नेता, स्थानीय जनप्रतिनिधि, समाजसेवी, धार्मिक अगुवा र देश–विदेशबाट आएका अतिथिहरूको उपस्थिति रहेको थियो। प्रमुख अतिथि यादवले आफ्नो सम्बोधनमा बलरा क्षेत्रको ऐतिहासिक, सांस्कृतिक र धार्मिक महत्वलाई जोड दिँदै मेलाले सामाजिक एकता, सद्भाव र भाइचारा मजबुत बनाउन महत्त्वपूर्ण भूमिका खेल्ने बताउनुभयो। उहाँले जनमत पार्टी सदैव स्थानीय संस्कृति र परम्पराको संरक्षणका पक्षमा रहने र धर्म–संस्कृतिको विकासका लागि निरन्तर पहल गरिरहने प्रतिबद्धता पनि व्यक्त गर्नुभयो।
मेलाको आकर्षणको मुख्य केन्द्रविन्दु देश–विदेशका करिब सयौँ पहलवानबीचको रोमाञ्चक कुस्ती प्रतियोगिता रह्यो। विभिन्न जिल्लाबाट आएका कुस्ती खेलाडीहरूले आफ्नो सीप, दमखम र खेलकला प्रस्तुत गर्दा दर्शक दीर्घा उत्साहले भरिएको थियो। खेलकुदका माध्यमबाट आपसी मेलमिलाप र सहकार्यको सन्देश प्रवाह गर्ने उद्देश्यले आयोजना गरिएको यो प्रतियोगिताले स्थानीय युवामा खेलप्रतिको रुचि र उत्साह बढाएको छ।
त्यसैगरी, मेलामा विभिन्न सांस्कृतिक कार्यक्रमहरू समेत प्रस्तुत गरिएका थिए। स्थानीय कलाकारहरूद्वारा प्रस्तुत लोकनृत्य, भजन, झाँकी प्रदर्शन तथा परम्परागत संगीतले सम्पूर्ण वातावरणलाई धार्मिक र सांस्कृतिक रौनकले भरिएको बनायो। मेलाको मूल उद्देश्य धर्म, संस्कृति र परम्पराको संरक्षण गर्दै समाजमा एकता, सद्भाव र भाइचारा कायम राख्ने रहेको आयोजक समितिले जनाएको छ।
यस ऐतिहासिक महाबिरी झण्डा मेलाको परम्परा अनुसार, हरेक वर्ष आश्विन पूर्णिमाको दिन यो मेला आयोजना गरिँदै आएको छ। मेलाको माध्यमबाट स्थानीय धार्मिक स्थलको प्रचार–प्रसार, पर्यटकीय सम्भावना र सामाजिक एकताको सन्देश देशभर फैलिने विश्वास व्यक्त गरिएको छ।
यो मेला केवल मनोरञ्जनको माध्यम मात्र नभई धार्मिक आस्था, सांस्कृतिक पहिचान र सामाजिक एकताको प्रतीकका रूपमा स्थापित हुँदै गएको स्थानीय बासिन्दाहरूले बताएका छन्।