मधेश प्रदेशको राजनीतिक भूमिमा फेरि एकपटक ठूलो तरंग उत्पन्न भएको छ। करिब ७ सय नेता तथा कार्यकर्ताहरूले विभिन्न दल परित्याग गर्दै जनमत पार्टीमा सामूहिक रूपमा प्रवेश गरेपछि यहाँको राजनीतिक समीकरण फेरिन थालेको संकेत देखिएको छ। बारा जिल्लाको सदरमुकाम कलैयामा आयोजित भव्य समारोहमा जनमत पार्टीका अध्यक्ष डा. सिके राउतले उनीहरूलाई पार्टीमा स्वागत गरे। नवप्रवेशीहरूमध्ये पूर्व संविधानसभा सदस्य प्रमोद प्रसाद गुप्ता, पूर्व प्रदेशसभा सदस्य पारस प्रसाद साह, जनता समाजवादी पार्टी (जसपा) नेपालका पाँच जना वडा अध्यक्षका प्रत्यासीसहित दर्जनौं स्थानीयस्तरका प्रभावशाली नेता तथा कार्यकर्ताहरू रहेका छन्।
पार्टी प्रवेश समारोह निकै उत्साहजनक र जनसहभागिताले भरिएको थियो। कार्यक्रमलाई सम्बोधन गर्दै अध्यक्ष डा. राउतले जनमत पार्टी कुनै व्यक्तिगत लाभ वा पदको राजनीति नगरेर जनता, अधिकार, न्याय र समृद्धिको राजनीति गर्ने पार्टी भएको स्पष्ट पारे। उनले नवप्रवेशीहरूप्रति धन्यवाद ज्ञापन गर्दै पार्टीको नीति, सिद्धान्त र मिशनप्रति समर्पित भएर कार्य गर्न आग्रह गरे। साथै, उनले जनताको सेवा र मुलुकको समुन्नतिका लागि जनमत पार्टी सधैं अग्रपंक्तिमा रहने विश्वास पनि दिलाए।
जनमत पार्टीमा प्रवेश गर्ने नेताहरूको भनाइमा, उनीहरू डा. राउतको नेतृत्वशैली, इमानदारिता, तथा मधेश र समग्र देशप्रतिको दृष्टिकोणबाट प्रभावित भई पार्टीमा आबद्ध भएका हुन्। उनीहरूले पुराना दलहरूले जनताको विश्वास गुमाउँदै गएको र राजनीतिक स्वार्थका कारण विकास र समावेशी शासनमा कमजोरी आएको गुनासो गर्दै अब नयाँ विकल्पको रूपमा जनमत पार्टीलाई रोजेको बताए।
राजनीतिक विश्लेषकहरूका अनुसार, यो सामूहिक प्रवेश मधेश प्रदेशको भविष्यका राजनीतिक परिदृश्यलाई निर्णायक रूपमा प्रभावित गर्नसक्ने एक ठोस संकेत हो। दिनानुदिन जनमत पार्टीप्रतिको जनआकर्षण बढिरहेको छ, जुन पार्टीको संगठन विस्तार, जनस्तरसँगको सम्बन्ध र आगामी निर्वाचनमा प्रभावशाली प्रदर्शनका रूपमा देखा पर्नसक्छ।
यस घटनाले अन्य राजनीतिक दलहरूलाई पनि चेतावनी दिने संकेत गरेको छ, कि अब जनताको समर्थन पुराना नाराले होइन, स्पष्ट एजेन्डा र सक्षम नेतृत्वबाट मात्र जित्न सकिन्छ। यस प्रवेशसँगै मधेश प्रदेशमा जनमत पार्टीको पकड अझ बलियो भएको छ भने, आगामी दिनहरूमा यसको प्रभाव राष्ट्रिय राजनीतिसम्म फैलिन सक्ने आँकलन गरिएको छ।