प्रेस सेन्टर नेपाल, पर्सा शाखाले वरिष्ठ पत्रकार तथा शहीद कृष्ण सेन ‘इच्छुक’को २३औँ स्मृति दिवसको अवसरमा ‘पत्रकारिता : चुनौती र अवसर’ शीर्षकमा एक दिवसीय क्षमता अभिवृद्धि तथा अभिमुखीकरण कार्यक्रम आयोजना गरेको छ।
कार्यक्रमको उद्घाटन तथा प्रमुख आतिथ्यता प्रेस सेन्टर नेपालका केन्द्रीय अध्यक्ष कमल गिरीले गर्नुभएको थियो। कार्यक्रममा बोल्दै अध्यक्ष गिरीले पत्रकार कृष्ण सेन इच्छुकले नेपाली पत्रकारिता आन्दोलनमा पुर्याएको योगदानको स्मरण गर्दै, उनको बलिदानले सत्य, निष्पक्षता र जनपक्षीय मूल्यमा आधारित पत्रकारिता परम्परा निर्माण गरेको उल्लेख गरे।
प्रेस स्वतन्त्रता र तथ्यमा आधारित पत्रकारिताको आवश्यकता
अध्यक्ष गिरिले वर्तमान समयमा पनि प्रेस स्वतन्त्रता र उत्तरदायी पत्रकारितामाथि चुनौती कायमै रहेको उल्लेख गर्दै भने, “कृष्ण सेन इच्छुकले पत्रकारितालाई सत्य र तथ्यको बलमा जनताको पक्षमा प्रयोग गर्नुभयो। आजको परिवेशमा पत्रकारितालाई फेरि त्यसै दिशामा लैजानुपर्ने खाँचो छ।”
उनले प्रेस सेन्टर अन्तर्गतका पत्रकारहरूले भिन्न दृष्टिकोणसहित वस्तुनिष्ठ र तथ्यपरक पत्रकारिताको अभ्यास गर्नुपर्नेमा जोड दिए। “अनुसन्धानमूलक, तथ्यांकमा आधारित र जनतासँग प्रत्यक्ष सरोकार राख्ने समाचार लेखनमा सक्रिय हुनु आजको आवश्यकता हो,” उनले स्पष्ट पारे।
सक्रिय सहभागिता र अनुभूतिको आदान–प्रदान
कार्यक्रममा पर्सा जिल्लाका पत्रकारहरूको उल्लेखनीय उपस्थिति रहेको थियो। सहभागीहरूले प्रशिक्षणबाट व्यावसायिक पत्रकारिताको सैद्धान्तिक तथा व्यवहारिक पक्षबारे थप जानकारी र सिप हासिल गरेको प्रतिक्रिया दिएका थिए।
कार्यक्रमले नयाँ पुस्ताका पत्रकारहरूलाई जनउत्तरदायी पत्रकारिता गर्ने प्रेरणा दिने विश्वास व्यक्त गरिएको थियो। कार्यक्रमको सञ्चालन प्रेस सेन्टर पर्साका सचिवले गर्नुभएको थियो भने, विभिन्न तहका सञ्चारकर्मी, सम्पादक, प्रशिक्षक र समाजका प्रतिनिधिहरूको पनि उपस्थिति रहेको थियो।