काठमाडौं, १० मंसिर : सरकारले सुनको भन्सार दर घटाउने निर्णय गरेसँगै नेपाली बजारमा सुनको मूल्यमा ठूलो गिरावट आएको छ। नेपाल सुनचाँदी व्यवसायी महासंघका अनुसार सोमबार तोलाको सुनको मूल्य १५ हजार ९ सय रुपैयाँले घटेर १ लाख ५१ हजार ३ सय रुपैयाँ कायम भएको छ।
सरकारले भन्सार दरलाई २० प्रतिशतबाट घटाएर १० प्रतिशत बनाएपछि यो मूल्य समायोजन गरिएको महासंघका अध्यक्ष अर्जुन रसायलीले जानकारी दिए। उनका अनुसार, “भन्सार दर घटेसँगै सुनको आयात लागत घटेको हुँदा यसको प्रत्यक्ष असर बजार मूल्यमा परेको हो।”
सुनजस्तै चाँदीको भाउमा पनि तोलामा ९५ रुपैयाँले गिरावट आएको छ। चाँदीको भन्सार दर पनि १५ प्रतिशतबाट १० प्रतिशतमा झारिएको छ।
सरकारले भन्सार दर घटाउनुको मुख्य उद्देश्य सुनको तस्करी नियन्त्रण गर्नु रहेको भन्सार विभागका महानिर्देशक हरिशरण पुडासैनीले बताए। उनले भने, “भारतबाट सुनको तस्करी बढेको भन्ने गुनासो आएपछि भन्सार दर घटाउने निर्णय गरिएको हो। यसले औपचारिक बाटोबाट सुन आयातलाई प्रोत्साहन गर्ने विश्वास गरिएको छ।”