काठमाडौं, १२ कात्तिक: नेकपा एमालेले आगामी आमचुनावलाई लक्षित गर्दै देशभरका मतदाताको राजनीतिक आबद्धताको विवरण संकलन गर्ने अभियानलाई तीव्रता दिएको छ। पार्टीले हरेक घरधुरीमा पुगेर मतदाताको संख्या, पार्टीगत आबद्धता लगायतका विवरण संकलन गर्ने योजना बनाएको हो।
एमाले पोलिटब्यूरो सदस्य विशाल भट्टराईका अनुसार, यो अभियानले पार्टीलाई आफ्नो संगठनलाई बलियो बनाउन र आगामी चुनावमा निर्णायक शक्ति बन्न सहयोग पुग्ने विश्वास गरिएको छ। उनले भने, “हामी हरेक मतदाताको मन जित्न चाहन्छौँ र यसका लागि उनीहरूको चाहना र आवश्यकता बुझ्न जरुरी छ।”
उपचुनावबाट सुरु भएको अभियान
यो अभियान हालै सम्पन्न भएका उपचुनाव क्षेत्रबाट सुरु भएको हो। अब यो अभियान देशभरका सबै वडामा सञ्चालन गरिनेछ। एमाले संगठन विभागको निर्देशनअनुसार, प्रदेश कमिटीहरूले यो अभियानको समन्वय गर्नेछन्।