वीरगञ्ज, ७ मंसिर: पर्सा प्रहरीले विशेष सूचनाका आधारमा एक मिनी ट्रकबाट ८५ किलो गाँजासहित तीन जनालाई पक्राउ गरेको छ।
पक्राउ पर्नेहरूमा ट्रक चालक ३६ वर्षीय शान्त बहादुर तिमिल्सिना (सिन्धुपाल्चोक), ४८ वर्षीय प्रेम रुम्बा ९मकवानपुर० र ३८ वर्षीय सूर्य बहादुर मोक्तान (मकवानपुर) रहेका छन्। प्रहरीको संयुक्त टोलीले शुक्रबार बिहान वीरगञ्ज–१६ बाइपास सडकमा उनीहरूलाई पक्राउ गरेको हो।
प्रहरीले मिनी ट्रकलाई रोकेर चेकजाँच गर्दा ट्रकको कन्टेनरमा लुकाइएको अवस्थामा ४ वटा बोरा गाँजा फेला पारेको थियो। गाँजा लुकाउन विशेष कडाइ गरिएको भए पनि प्रहरीको सतर्कताले लागूऔषध बरामद गर्न सफलता मिलेको जिल्ला प्रहरी कार्यालय पर्साका प्रवक्ता प्रहरी नायव उपरीक्षक (डिएसपी) किशोर लम्सालले बताए।
डिएसपी लम्सालका अनुसार, ट्रक चालक शान्त बहादुर तिमिल्सिनाको भूमिका स्पष्ट भए पनि अन्य दुई जनाको संलग्नताका बारेमा थप अनुसन्धान भइरहेको छ। पक्राउ परेका तीनै जनालाई जिल्ला प्रहरी कार्यालय पर्सामा राखेर घटनाको विस्तृत अध्ययन भइरहेको छ।
डिएसपी लम्सालले यो बरामदगीलाई लागूऔषध नियन्त्रणका लागि महत्त्वपूर्ण उपलब्धि भएको बताए। प्रहरीले लागूऔषध ओसारपसार गर्ने गिरोहमाथि थप अनुसन्धान जारी राखेको छ। साथै, घटनामा संलग्न अन्य व्यक्तिहरूको पहिचानका लागि पनि अनुसन्धानको दायरा विस्तार गरिएको छ।
वीरगञ्जका विभिन्न स्थानहरूबाट नेपाल–भारत सीमा क्षेत्र हुँदै लागूऔषध ओसारपसारको जोखिम बढिरहेको अवस्थामा प्रहरीले सक्रियता देखाउँदै ठूला परिमाणका लागूऔषध नियन्त्रण गर्न सफलता प्राप्त गरेको हो।