काठमाडौं, ४ कात्तिक: रवि लामिछाने पक्राउ प्रकरणलाई लिएर पोखरामा भएको प्रदर्शनमा प्रहरीले बल प्रयोग गरेको छ। रास्वपाका कार्यकर्ताले नाराबाजी गर्दै प्रदर्शन गरिरहेका बेला स्थिति तनावग्रस्त बनेपछि प्रहरीले पानीको फोहोरा र अश्रुग्यास प्रहार गरेको हो।
शुक्रबार काठमाडौंबाट पक्राउ परेका रास्वपा सभापति तथा पूर्व गृहमन्त्री रवि लामिछानेलाई शनिबार राति पोखरा लगिएको थियो। आइतबार उनलाई जिल्ला अदालत कास्कीमा उपस्थित गराइएको थियो। लामिछानेलाई अदालतमा उपस्थित गराउने दिन सहकारी पीडितहरू मुस्ताङ चोकमा प्रदर्शन गरिरहेका थिए। यसैबीच, रास्वपाका कार्यकर्ताहरूले पनि लामिछानेको समर्थनमा नाराबाजी गर्न थालेपछि स्थिति तनावग्रस्त बनेको थियो।
भीड नियन्त्रण गर्न प्रहरीले पानीको फोहोरा र अश्रुग्यास प्रहार गरेको हो। प्रहरीले निषेधित क्षेत्र तोडेको भन्दै प्रदर्शनकारीलाई तितरबितर पार्ने प्रयास गरेको थियो। तर, रास्वपाका कार्यकर्ताहरूले निषेधित क्षेत्र छाड्न मानेका थिएनन्। यसपछि प्रहरीले थप बल प्रयोग गर्ने चेतावनी दिएको थियो।
प्रहरी र प्रदर्शनकारीबीच झडप हुँदा केही प्रदर्शनकारी घाइते भएको बताइएको छ। यद्यपि, यसको पुष्टि भएको छैन।
रवि लामिछानेको पक्राउले रास्वपाका कार्यकर्ताहरूमा असन्तुष्टि पैदा भएको छ। उनीहरूले लामिछानेलाई निर्दोष भएको दाबी गर्दै उनको रिहाईको माग गरिरहेका छन्।